轉去

Khòaⁿ lí ē sí--bōe ?

看你會死--未?

  Chhàu-sái-gôan--a hit ki chhùi chin to̍k, in kui chng ê lâng lóng chin thó-ià--i. I piān nā khui-chhùi kóng-ōe, ōe lāi-té lóng ē kâⁿ 1-2 kù pháiⁿ-thiaⁿ ê ōe-bó, hō͘ lâng thiaⁿ liáu kám-kak chiok ngāi-gio̍h, chiok bōe-sóng--ê。  臭屎元--a hit支嘴真毒,In規庄ê人攏真討厭--伊。伊便若開嘴講話,話內底攏會kâⁿ 1~2句歹聽ê話母,hō͘人聽了感覺足ngāi-gio̍h,足bōe爽快--ê。
  Ū 1-kang i tī chhù--nih leh phàu-tê ê sî-chūn, keh-piah 1-ê gín-á hiông-hiông tùi gōa-kháu cháu--ji̍p-lâi, bô sè-jī soah kā kòng-phòa 1-tè au-á. I chin siū-khì, tō mē kóng:“Lí chit-ê kâu-sí-gín-á sī bô seⁿ ba̍k-chiu--hioh? Chiah-nih súi ê au-á kā góa lòng-lòng phòa, khòaⁿ lí ē sí--bōe ?” Hit-ê gín-á hō͘ mē kah chiâⁿ m̄ kam-gōan.  有1工伊tī厝--nih leh泡茶ê時陣,隔壁1個囝仔雄雄對外口走--入-來,無sè-jī soah kā摃破1塊甌仔,伊真受氣,tō罵講:「你chit-ê猴死囝仔是無生目睭--hioh? Chiah-nih súi ê甌仔kā我lòng-lòng破,看你會死--未?」hit-ê囝仔hō͘罵kah chiâⁿ m̄甘願。
  Chiàⁿ-go̍eh chhe i chia̍h chhun-chiú pháiⁿ pak-tó͘, tō khì chhōe i-seng beh the̍h io̍h-á. I-seng mn̄g i tó-ūi leh kan-khó͘?  正月初伊食春酒食歹腹肚,tō去chhōe醫生beh the̍h藥仔。醫生問伊叨位leh艱苦?
  ”I-seng--a, a̍h góa to it-ti̍t làu-sái làu bōe thêng--lah, khòaⁿ lí ē sí--bōe?“  「醫生--a,a̍h我to一直漏屎漏bōe停--lah, 看你會死--未?」
  Hit-ê I-seng thiaⁿ 1-ē khì kah bīn-á chheⁿ-sún-sún.  Hit-ê醫生聽1-ē氣kah面仔青筍筍。
  Gôan-siau hit-kang thàu-chá, i chi̍t chhut-mn̂g tō khì tú-tio̍h tòa tī Chiàⁿ-hoan-chhù, choan-bûn leh kâng chhôan “Lāu kè-chng” ê tiàm-thâu-ke, i kiâⁿ óa--khì, khui-chhùi kā mn̄g kóng:“Lín tiàm--nih chit-chiām-á seng-lí hó--bô?”  元宵hit工透早,伊chi̍t出門tō去tú-tio̍h tòa-tī正番厝,專門leh kâng chhôan「老嫁粧」ê店頭家,伊行óa去,開嘴kā問講:「恁店--nih這chām仔生理好--bò?」
   Hit-ê keng-siau “Hok-siū-pâi âng-bîn-chhn̂g” ê tiàm-thâu-ke chai-iáⁿ chhàu-sái-gôan--a kiàn kóng lóng bô hó-ōe, i kóng ê ōe nā ē thiaⁿ--tit, káu-sái mā ē chia̍h--tit, kiaⁿ kóng khah-thêng-á ē khì hō͘ kóng pháiⁿ-ōe “phah-chhek-soe”, tō kóaⁿ-kín tùi-chhùi kā i ìn kóng : “Iáu-siū--o͘ ! Chòe-kīn seng-lí chiâⁿ-bái--leh ! Khòaⁿ lí ē sí--bōe ? ”  Hit-ê經銷「福壽牌紅眠床」ê店頭家知影臭屎元--a kiàn講攏無好話,伊講ê話nā會聽--得,狗屎mā會食--得,驚講khah-thêng-á會去hō͘講歹話「phah-chhek-soe」,tō趕緊對嘴kā伊應講:「夭壽--o͘ !最近生理chiâⁿ-bái--neh!看你會死--未?」
Thê-kiong-chiá : Iûⁿ Chín-jū
轉去