轉去

Phàu 3-bān ê tê chhiáⁿ--lí

泡3萬ê茶請--你

  Chhî táng--ê sī chhut-miâ ê“Tê phok-sū”, tùi phàu-tê ê gē-su̍t put-chí-á ū gián-kiù. I chin ài chio lâng khì in tau phàu-tê, phàu--ê lóng sī tī Lâm-tâu Lo̍k-kok-hiang Lông-hōe pí-sài tio̍h-chióng ê Tàng-téng-o͘-liông. Nā-sī tú-tio̍h khah ko-kùi ê lâng-kheh, I the̍h--chhut-lâi ê tê-bí“Kip-sò͘”koh-khah kôan, khí-bé sī “thâu-téng-siúⁿ”--ê, kè-siàu thiaⁿ-kóng 1-kin lóng tī 1-bān kho͘ í-siōng.  徐董--ê是出名ê「茶博士」,對泡茶ê藝術不只á有研究。伊真愛招人去In兜泡茶,箍泡ê攏是tī南投鹿谷鄉農會比賽著獎ê凍頂烏龍。若是tú著khah高貴ê人客,伊the̍h出來ê茶米「級數」koh kahh kôan,起碼是「頭等賞」--ê,價siàu聽講1斤攏tī 1萬以上。
  Ū 1-kang, i kap tê-iú“Phok-sū-phok”Tân--ê chò-tīn, sim-chêng chiâⁿ chán, tō iau-chhiáⁿ Tân--ê khì in tau phàu-tê khai-káng.  有1工,伊kap茶友「博士博」 陳--ê做陣,心情chiâⁿ chán, tō邀請陳--ê去In兜泡茶開講。
  “Bô--nō͘ ! Ta̍k-pái lóng khì lí hia, chit-pái ōaⁿ lí khì góa hia m̄ chiah-tio̍h !”  「無- -no͘! 逐擺攏去你hia,chit擺換來去我hia m̄-chiah-tio̍h!」
  “A̍h lí hia káⁿ ū hó tê ? ”  「A̍h你hia敢有好茶?」
  “Â~à! Sam-pat hiaⁿ-tī, he a̍h-tio̍h kóng, lí chit-ê kùi-pin hán-tit kàu, góa phàu 3-bān--ê chhiáⁿ--lí ! ”  「Â~à!三八兄弟,he a̍h-tio̍h講,你chit-ê貴賓罕得到,我泡三萬- -ê請- -你!」
  “Káⁿ ū-hiáⁿ ? A̍h lí khì tó-ūi bé--ê ? ”  「敢有影?ah你去叨位買--ê?」
  Chhî táng--ê pòaⁿ-sìn-pòaⁿ-gî lâi-kàu Tân--ê in tau, chē--lo̍h-lâi, tán chiâⁿ kú chúi chiah hiâⁿ kún, Tân--ê chiok pó-kùi ê khóan, tùi tû-á lāi the̍h 1-khok 4- niú-chng--ê chhut--lâi, ûn-ûn-á kā tê-bí tò lo̍h-khì tê-kó͘ lāi, chiah-koh khoaⁿ-khoaⁿ-á kā kún-chúi chhiong--lo̍h-khì, koh tán 3-4 hun-cheng, I chiah kā í-keng chhèng chhut phang-bī ê tê-chúi thîn ji̍p-khì sè-tè au-á lāi, phâng 1-poe hō͘ Chhî tàng--ê.  徐董--ê半信半疑來到陳--e In兜,坐- -落-來,等chiâⁿ久水才hiâⁿ滾,陳--ê足寶貝ê款,對櫥仔內the̍h 1-khok 4兩裝--ê出--來,ûn-ûn-á kā茶米倒落去茶kó͘內,才kohkhoaN2-khóaⁿ á kā滾水沖--落-去,ko等3~4分鐘,伊才kā已經chhèng出芳味ê茶水thîn入去細塊au-á內,phâng 1杯hō͘徐董--ê。
  “Seng phīⁿ khòaⁿ-māi, chit phàu tê ê âu-ūn bōe-bái--o͘ ! ”  「先鼻看- -māi,chit泡茶ê喉韻bōe bái--o͘!」
  Chhî táng--ê phâng--kòe-lâi, khin-khin-á chi̍p 1-chhùi, khui-chhùi kóng :“Phang-thâu sī ū-kàu chán--lah, sī kóng chit phàu tê káⁿ chin-chiàⁿ sī 3-bān--ê ? ”  徐董--ê phâng過來,輕輕á chi̍p 1嘴,開嘴問講:「芳頭是有夠chán--lah, 是講chit泡茶敢真正是三萬- -ê?」
  “Sī--a ! Lí bô khòaⁿ-tio̍h góa hiâⁿ chúi bān, chhiong-tê bān, thâu-tú-á leh chîn-tê ā chin bān--hioh ? ”  「是--a !你無看tio̍h我hiâⁿ水慢、沖茶慢,頭-tú-á leh thîn茶ā真慢--hioh?」
Thê-kiong-chiá : Iûⁿ Chín-jū
轉去