 Chit-ê lō͘-piⁿ teh gîm-si kiû-khit-ê chhiⁿ-mî lâng sī sím-mi̍h lâng, taⁿ lán tio̍h chiām-sî tó-tńg khì khòaⁿ i ê sū-chêng kap keng-kòe. | 這個路邊teh吟詩求乞ê青瞑人是甚物人，今咱著暫時倒轉去看伊ê 事情kap經過。| Kīn 40 gōa-nî í-chêng ê sū, tī Tâi-lâm ê × × ke ê tiong-chām ū chi̍t-chō hôa-bí ê tōa iûⁿ-lâu, chha-put-to sī tong-sî chòe tông-hông ê kiàn-tio̍k. | 近40外年以前ê事，tī台南ê ××街ê中站有一座華美ê大洋樓，差不多是當時最堂皇ê建築。| Hit-ê iûⁿ-lâu ê chú-lâng kiò-chò Chhòa Péng-bûn, lâng phó͘-thong kiò i Péng-bûn-á-sià, sī chi̍t-ūi ke̍k-kî pù-ū ê gia̍p-chú. | Hit-ê洋樓ê主人叫做蔡炳文，人普通叫伊炳文阿舍，是一位極奇富有ê業主。| I ê hū-jîn lâng ū seⁿ nn̄g ê hāu-siⁿ kap chi̍t-ê cha-bó͘ kiáⁿ. | 伊ê 婦人人有生兩個後生kap一個查某子。| Ū chi̍t-pái tē jī-kiáⁿ tī Ji̍t-pún teh tha̍k tāi-ha̍k ê sî sòa tú-tio̍h tōa-pīⁿ. Lāu-bú, Chhòa hū-jîn chiap-tio̍h siau-sit chiū chhóng-chhóng pông-pông tà-chûn kòe Ji̍t-pún khì khòaⁿ i ê kiáⁿ. | 有一擺第二子tī 日本teh讀大學ê 時續 tú著大病。老母，蔡婦人接著消息就chhóng-chhóng pông-pông 搭船過日本去看伊ê 子。| Tī hū-jîn lâng chhut-gōa chiâⁿ-nî ê sî, chit-ê hong-liû ê chú-lâng sòa kap chi̍t-ê chhù-lāi ê lú-pī hoat-seng koan-hē. | Tī 婦人人出外成年ê時，這個風流ê主人續 kap一個厝內ê女婢發生關係。| Pi-ke̍k tùi chia khai-sí. Kàu tī hū-jîn lâng thiaⁿ-kìⁿ chit-ê sū-chêng tùi Ji̍t-pún piàⁿ tńg-lâi ê sî, chit-ê lú-pī í-keng seⁿ chi̍t-ê ta-po͘ eⁿ-á lah. | 悲劇tùi chia 開始。到tī婦人人聽見這個事情tùi日本拚轉來ê 時，這個女婢已經生一個查甫嬰仔lah。| Keng-kòe ge̍h-gōa ji̍t āu, khó-lîn ê bú-kiáⁿ chiū siū kóaⁿ-chhut chit-ê òan-thàn ê tōa-lâu. | 經過月外日後，可憐ê母子就受趕出這個怨嘆ê大樓。| Lāu-bú lâu ba̍k-sái phō i ê eⁿ-á khì óa-khò tòa tī soaⁿ-lāi chhân-chng ê a-hiaⁿ. | 老母流目屎抱伊ê 嬰仔去倚靠tòa tī山內田庄ê阿兄。| Chit-ê soaⁿ-lāi ê chhân-chng chí-ū sī pah gōa-hō͘ chi̍p-ha̍p khiā-khí ê chi̍t-ê sió pō͘-lo̍k. | 這個山內ê田庄只有是百外戶集合企起ê一個小部落。| Khiok tī chia ū chū-jiân-kài só͘ ōe-thang hō͘ lâng lóng-chóng ê bí-sek kap khòai-lo̍k móa-móa, thang khòaⁿ-kìⁿ sè-gōa thô-hn̂g ê pêng-an tī hia. Tī chit-ê chng-siā ê téng-bīn, soaⁿ-kha ū chi̍t-keng Thian-chú kàu-tn̂g, tōa-pō͘-hūn ê peh-sèⁿ nā kàu lé-pài ji̍t chiū hioh-khùn lóng-chóng ê kang-chok, kàu lé-pài-tn̂g khì chòe lé-pài, siú mī-sat. | 卻tī chia有自然界所會thang hō͘人攏總ê美色kap快樂滿滿，thang看見世外桃源ê平安tī hia。Tī 這個庄社ê頂面，山腳有一間天主教堂，大部份ê百姓若到禮拜日就歇睏攏總ê工作，到禮拜堂去做禮拜，守彌撒。| Chit-ê siū-khó͘ ê lāu-bú khòaⁿ chit-ê só͘-chāi sī chòe thang hō͘ in bú-kiáⁿ tit-tio̍h siám-pī sè-jîn ê ki-chhì kap pâi-thek ê tōe. Bô gî-gō͘ in bú-kiáⁿ chi̍t-ē ta̍h ji̍p chit-ê tōe, chôan-chng ê peh-sèⁿ lóng saⁿ-kap gī-lūn. “In sī sím-mi̍h lâng?” Chit-ê gī-lūn bô-kú chiū seⁿ-chhut kiat-lūn. | 這個受苦ê老母看這個所在是最thang hō͘ in母子得著閃避世人ê譏刺kap排斥ê地。無疑悟in母子一下踏入這個地，全庄ê百姓攏相kap議論。「In是甚物人？」這個議論無久就生出結論。| “Ū chi̍t-ê hōan-chōe ê hū-jîn lâng, phō i hōan-chōe ê kiáⁿ ji̍p lâi chit-ê chng-siā!” Chit-ê siau-sit ū tín-tāng chôan-chng. Sū-si̍t chit-khóan ê sū tī chit-ê chng-siā sī chi̍t-ê thang-kiaⁿ thang-ùi ê tāi-chì. | 「有一個犯罪ê婦人人，抱伊犯罪ê子入來這個庄社 ！」這個消息有振動全庄。事實這款ê事tī 這個庄社是一個thang驚thang畏ê代誌。| Tī khe-chúi piⁿ sóe-saⁿ ê hū-jîn lâng chiong chit-ê kiaⁿ-lâng ê tōa-sū lâi chò in ê ōe-pèⁿ, saⁿ-kap kóng lâi chhiò. | Tī 溪水邊洗衫ê婦人人將這個驚人ê大事來做in ê話柄，相kap講來笑。| Lāu hū-jîn lâng khòaⁿ-tio̍h chit-ê khó-lîn ê lāu-bú tùi in ê sin-piⁿ kòe-khì, chiū phùi-nōa, gia̍h keng-thâu, ōe si̍p-jī tī heng-chêng lâi piáu-sī iàm-ò͘ⁿ. | 老婦人人看著這個可憐ê老母tùi in ê身邊過去，就phùi 瀾，gia̍h肩頭，畫十字tī 胸前來表示厭惡。| “Ù-òe mi̍h!” In ê chhùi-lāi án-ni liām, in bú-kiáⁿ chiâⁿ-chòe chôan-chng ê thah-gāi. “Chit-ê chōe-ok ê kiáⁿ tio̍h hiat-kak, m̄-thang chhī chit-ê, tek-khak ōe ín chai-lān!” | 「污穢物！」In ê嘴內án-ni唸，in母子成做全庄ê窒礙。「這ê罪惡ê子著hiat-kak，m̄-thang飼這個，的確會引災難！」| A-hiaⁿ ê ka-têng lóng bô hoaⁿ-hí in tī chit-ê só͘-chāi, siông-siông ēng ōe lâi kong-kek ki-chhì in. Koh iā kiaⁿ-liáu ū sím-mi̍h liân-lūi. Chit-ê kong-kek kap ki-chhì lóng bô léng-chēng, ná kú ná lī-hāi. | 阿兄ê家庭攏無歡喜in tī 這個所在，常常用話來攻擊譏刺in。Koh也驚了有甚物連累。這個攻擊kap譏刺攏無冷靜，那久那厲害。| Eⁿ-á tī chit-ê khôan-kéng ê lāi-bīn chiām-chiām tōa-hàn lah. Lāu-bú chiū kā i hō miâ chòe Pek-jím, chiū-sī pah-poaⁿ ê jím-siū. | 嬰仔tī 這個環境ê內面漸漸大漢lah。老母就kā伊號名做百忍，就是百般ê忍受。| Bú-kiáⁿ hām-lo̍h tī chin-tōa-ê khùn-lân. Khiok iā kám-kak lóng bô pa̍t tiâu lō͘, chiū āiⁿ chit-ê khó-lîn siū iàm-ò͘ⁿ ê kiáⁿ khioh chhiū-hio̍h á-sī ku̍t chháu-thâu chhut-lâi bōe, lâi î-chhî in ê seng-o̍ah. | 母子陷落tī 真大ê困難。卻也感覺攏無別條路，就āiⁿ 這個可憐受厭惡ê子拾樹葉抑是掘草頭出來賣，來維持in ê生活。| Ū-sî lāu-bú siūⁿ-tio̍h bú-kiáⁿ ê kéng-gū kap o͘-àm ê chiân-tô͘ lâi chē tī chhiū-kha háu. Pek-jím kàu tī chin tōa-hàn ōe-hiáu ìn-siōng tio̍h khó͘-miā lāu-bú ê ba̍k-sái tih tī i chia̍h-ni ê bīn. | 有時老母想著母子ê境遇kap烏暗ê前途來坐tī 樹腳哮。百忍到tī 真大漢會曉印象著苦命老母ê目屎滴tī伊食奶ê面。| Tī chit-ê chhám-kéng kòe liáu 10 gōa-nî, Pek-jím í-keng kap pa̍t-ê gín-ná ji̍p tī soaⁿ-ē ê sió-o̍h teh tha̍k-chheh lah! | Tī 這個慘境過了10外年，百忍已經kap別ê囡仔入tī山下ê小學teh讀冊lah！| Chóng-sī Pek-jím khai-sí hoat-hiān tī i ê sin-chiūⁿ ū chin-tōa ê put-hēng kap ko͘-toaⁿ. | 總是百忍開始發現tī 伊ê 身上有真大ê不幸kap孤單。| “Bô-pē kiáⁿ m̄-sī lâng!Pek-jím khó-ò͘ thâng!” | 「無父子m̄ 是人！百忍可惡蟲！」| Tông-ha̍k chò koa-khek lâi ki-chhì pâi-thek i. Lâng nā khòaⁿ-tio̍h i chiū cháu-siám khì, iā bô lâng beh kap i tâng-toh. | 同學做歌曲來譏刺排斥伊。人若看著伊就走閃去，也無人beh kap伊同桌。| “Ma-ma, lâng sī án-chóaⁿ kiò góa bô-pē-kiáⁿ, kiò góa khó-ò͘ thâng nè?” Pek-jím khai-sí chiong i ê khó͘-sū lâi chit-mn̄g i ê lāu-bú. | 「媽媽，人是án-chóaⁿ 叫我無父子，叫我可惡蟲nè？」百忍開始將伊ê苦事來質問伊ê 老母。| “Pek-jím, chhiáⁿ lí m̄-thang mn̄g góa sím-mi̍h! Lóng sī ma-ma ê chōe, chhiáⁿ lí tio̍h sià-bián góa, lóng sī góa m̄-tio̍h!” Lāu-bú lám-óa kiáⁿ-jî lâi tōa-háu. | 「百忍，請你m̄-thang 問我甚物！攏是媽媽ê罪，請你著赦免我，攏是我m̄ 著！」老母攬倚子兒來大哮。| Chóng-sī kàu Pek-jím pi̍t-gia̍p bô-kú, chit-ê siū-khó͘ ê lāu-bú chiū tài-pīⁿ soah kòe-sin. Pek-jím chū-jiân kui-sio̍k i ê a-kū, lâi pang-chān chhân-hn̂g í-ki̍p lóng-chóng khùn-khó͘ ê kang-chok. Pek-jím tī chit-ê ka-têng ê seng-o̍ah sī chin put-hēng. A-kū khòaⁿ i chò gû-bé lâi khó͘-chhó͘ iàm-chiān i. I ta̍k-ji̍t lóng tī soaⁿ-iá teh kap thô͘-bê chò-hóe. Tī hā-thiⁿ ū jia̍t-iām ê ji̍t, tī kôaⁿ-thiⁿ ū hân-léng ê pak-hong teh khó͘-chhó͘ i ê sin-khu. | 總是到百忍畢業無久，這個受苦ê老母就帶病煞過身。百忍自然歸屬伊ê 阿舅，來幫贊田園以及攏總困苦ê工作。百忍tī 這個家庭ê生活是真不幸。阿舅看伊做牛馬來苦楚厭賤伊。伊逐日攏tī 山野teh kap塗糜做伙。Tī夏天有熱焰ê日，tī 寒天有寒冷ê北風teh苦楚伊ê 身軀。| Ū-sî khòaⁿ-tio̍h pa̍t-ê ka-têng pē-bú kiáⁿ-jî thôan-lo̍k ê chêng-hêng lâi thó͘-khùi. Iā ū chin-chōe chheng-liân lâng chá-àm chhut-gōa siōng-o̍h ê chêng-hêng, hō͘ Pek-jím ê sim seⁿ-chhut chin-tōa ê sit-chì kap òan-chheh. I khai-sí thòng-òan i ê miā-ūn. I ê put-hēng chiong-ji̍t chhiong-móa i ê sim, lâi hō͘ i sî-siông chin ut-chut. | 有時看著別個家庭父母子兒團樂ê情形來吐氣。也有真濟青年人早暗出外上學ê情形，hō͘ 百忍ê心生出真大ê失志kap怨慼。伊開始痛怨伊ê 命運。伊ê 不幸終日充滿伊ê心，來hō͘ 伊時常真鬱卒。| I m̄-bat kiâⁿ-kàu lé-pài-tn̂g khì, lé-pài ji̍t chôan-chng ê peh-sìⁿ lóng bô chò-kang khì lé-pài, khiok i ka-kī cháu-kàu soaⁿ-iá ê chháu-po͘ khì tó tī chhiū-kha. | 伊m̄-bat行到禮拜堂去，禮拜日全庄ê百姓攏無做工去禮拜，卻伊家己走到山野ê草埔去倒tī 樹腳。| “Lí sī chōe-ok ê kiáⁿ, lí ê chôan-sin lóng ū chōe-ok ù-òe ê huih teh lâu, lí èng-kai tio̍h thòng-hóe iu-siong lâi kiû Thian-chú sià-bián lí ê chōe, nā bô lí tek-khak tī chōe-ok tiong tîm-lûn!” A-kū siông-siông án-ni tùi i kóng. Chóng-sī i kò͘-ì hóan-tùi kàu lé-pài-tn̂g. Ū-sî nā ko͘-put-chiong lâi tùi hia keng-kòe, i chiū phùi-nōa kóng, “Ū sím-mi̍h Thian-chú! I sī put-gī put-hoat ê sîn lah!” | 「你是罪惡ê子，你ê 全身攏有罪惡污穢ê血teh流，你應該著痛悔憂傷來求天主赦免你ê罪，若無你的確tī 罪惡中沈淪！」阿舅常常án-ni tùi伊講。總是伊故意反對到禮拜堂。有時若姑不chiong來tùi hia經過，伊就phùi 瀾講，「有甚物天主！伊是不義不法ê神lah ！」| Lâng-lâng iàm-ò͘ i, i iā iàm-ò͘ lâng, chôan sè-kài pâi-thek i, i iā pâi-thek chôan sè-kài. Kàu 18 hòe ê sî Pek-jím chiū khai-sí ka-kī kè-sio̍k tha̍k-chheh. Ta̍k-mî lóng tī i ê pâng-keng lâi àm-chīⁿ gián-kiù. I ê sin-thé iā í-keng chin sêng-se̍k kiat-si̍t lah. Tī chit-ê chng-siā chha-put-to bô lâng ōe-thang kap i pí-phēng. I chiâⁿ-chò chi̍t-ê hán-tit khòaⁿ-tio̍h ê eng-chùn, chheng-siù ê chheng-liân. I ê io̍k-bōng iā khai-sí sio-to̍h tī i ê sim-lāi. | 人人厭惡伊，伊也厭惡人，全世界排斥伊，伊也排斥全世界。到18歲ê 時百忍就開始家己繼續讀冊。逐暝攏tī 伊ê房間來暗靜研究。伊ê 身體也已經真成熟結實lah。Tī 這個庄社差不多無人會thang kap伊比並。伊成做一個罕tit看著ê英俊，清秀ê青年。伊ê 欲望也開始燒著 tī 伊ê 心內。| “Góa tio̍h ló͘-le̍k, lâi sóe góa lóng-chóng ê kiàn-siàu. Góa tio̍h tùi-khòng chôan sè-kài, tio̍h cheng-ho̍k i!” | 「我著努力，來洗我攏總ê見笑。我著對抗全世界，著征服伊！」| I siông-siông chiūⁿ kàu soaⁿ-niá téng khòaⁿ lo̍h pêng-iûⁿ ê to͘-chhī lâi án-ni koat-sim. | 伊常常上到山嶺頂看落平洋ê都市來án-ni 決心。| Kó-jiân bô-kú i ū tit-tio̍h chi̍t-ê ki-hōe thang lī-khui chit-ê hóan-kám ê chng-siā, khì ho̍k-bū tī Tâi-lâm chhī-lāi chi̍t-keng chòe-tōa ê pah-hòe kong-si. I chi̍t hong-bīn kong-chok chi̍t hong-bīn khûn-khûn tha̍k-chheh. Āu-lâi Pek-jím chiū chìn-ji̍p tī chi̍t-keng chhī-li̍p ê iā-ha̍k tha̍k tiong-ha̍k ê khò-thêng. I hui-siông jīn-chin khîn-bián, tì-kàu lóng kap pa̍t-lâng ū chin tōa ê hun-piat. 4 nî āu iā-ha̍k pi̍t-gia̍p ê sî i chiū tit-tio̍h chu-keh khì khó-chhì Tâi-pak ê ko-téng ha̍k-hāu. I put-tōan ê ló͘-le̍k kap jia̍t-jia̍t ê sim-chì pang-chān i, hō͘ i chin hó ê sêng-chek lâi ki̍p-keh, koh sòa ōe-thang tit-tio̍h kai-hāu ê chióng-ha̍k-kim. | 果然無久伊有得著一個機會thang離開這個反感ê庄社，去服務tī 台南市內一間最大ê百貨公司。伊一方面工作一方面勤勤讀冊。後來百忍就進入tī 一間市立ê夜學讀中學ê課程。伊非常認真勤勉，致到攏kap別人有真大ê分別。4年後夜學畢業ê 時伊就得著資格去考試台北ê高等學校。伊不斷ê努力kap熱熱ê心志幫贊伊，hō͘ 伊真好ê成績來及格，koh續會thang得著該校ê獎學金。| Pek-jím ê ló͘-le̍k chin-tōa sêng-kong lah! Khiok i bô lia̍h chit-ê chòe kàu-gia̍h lâi sit-lo̍h kín-sīn, sī tit-tio̍h chhut-la̍t ê tē-pō͘ lâi it-hoat ke-thiⁿ ló͘-le̍k. I liân khùn ê sî-kan iā kiám-chió, bô-lūn tī sím-mi̍h só͘-chāi, chheh lóng bô lī-khui i ê chhiú. I iā chhim-chhim pó-siú ko͘-toaⁿ ê seng-o̍ah. Só͘-í i ê sêng-chek sī te̍k-piat chhut-kûn. Sīm-chì i ū chin te̍k-piat bûn-ngá ê gōa-māu hō͘ lâng bōe-thang khòaⁿ-chhut ū sím-mi̍h o͘-àm ê cheng-sîn. | 百忍ê努力真大成功lah！卻伊無掠這個做夠額來失落謹慎，是得著出力ê地步來一發加添努力。伊連睏ê時間也減少，無論tī 甚物所在，冊攏無離開伊ê 手。伊也深深保守孤單ê生活。所以伊ê 成績是特別出群。甚至伊有真特別文雅ê外貌hō͘ 人bōe-thang看出有甚物烏暗ê精神。| Tī chiah-ê sū, chū-jiân hō͘ Pek-jím ê sim hoat-seng chin tōa ê iu-oat, kiau-ngō͘. I ê io̍k-bōng it-hoat chì-lia̍t sio-to̍h. Tī i ê sim-lāi ū chin tōa ê chū-sìn. | Tī chiah-ê事，自然hō͘ 百忍ê心發生真大ê優越，驕傲。伊ê 慾望一發至烈燒to̍h。Tī 伊ê 心內有真大ê自信。| Chóng-sī i tha̍k-kàu tē-jī nî bóe ê sî hut-jiân hoat-kak ū jiám-tio̍h hì-pīⁿ. Sin-thé ji̍t-ji̍t siau-sán soe jio̍k khì. | 總是伊讀到第二年尾ê時忽然發覺有染著肺病。身體日日消瘦衰弱去。| Chit-ê sū tú-tú sī sí-hêng ê thih-thûi kòng tī i ê thâu-khak chi̍t-iūⁿ, hō͘ i it-chhè lóng tōa iô-tāng. I khai-sí pàng-sak i ê chheh lah. I chhin-chhiūⁿ tùi kôaiⁿ-kôaiⁿ ê pòaⁿ-thiⁿ koh siak-lo̍h kàu tī o͘-àm cho̍at-bāng ê chhim-ian. Hit-ê kôaiⁿ-kôaiⁿ ê pòaⁿ-thiⁿ sī ēng hô-téng kè-chîⁿ lâi tit-tio̍h ê, hō͘ i kám-kak bô hoat-tō͘ thang jím-siū chit-ê sū-si̍t. | 這個事tú-tú是死刑ê鐵錘摃 tī 伊ê 頭殼一樣，hō͘ 伊一切攏大搖動。伊開始放sak 伊ê 冊lah。伊親像tùi懸懸ê半天koh摔落到tī 烏暗絕望ê深淵。Hit-ê懸懸ê半天是用何等價錢來得著ê，hō͘ 伊感覺無法度thang忍受這個事實。| “Góa lóng-chóng ê ló͘-le̍k kap siū-khó͘ tī tó-ūi?” I tī ha̍k-hāu hù-siat ê pēⁿ-īⁿ lāi, chhin-chhiūⁿ sit-sîn bô lêng-hûn ê lâng chē tiām-tiām, lóng bô tín-tāng. I kúi-nā-ji̍t lóng bô chia̍h-pn̄g, mî-sî iā m̄-chai i ū khùn-khì. Òan-thàn kap cho̍at-bāng ê tōa-hûn pau-ba̍t i ê chôan-sin. | 「我攏總ê努力kap受苦tī tó位？」伊tī 學校附設ê病院內，親像失神無靈魂ê人坐恬恬，攏無振動。伊幾若日攏無食飯，暝時也m̄ 知伊有睏去。怨嘆kap絕望ê大雲包密伊ê 全身。| “Taⁿ beh án-chóaⁿ?!” I chìn-chêng siūⁿ iā siūⁿ bô, tò-tńg siūⁿ iā siūⁿ bô ū sím-mi̍h, it-chhè lóng sī bông-bông biáu-biáu. Āu-lâi i chiū chin chhiⁿ-chhìn ê khóan lâi ka-léng-sún sòa khiā khí-lâi kiâⁿ-kàu thang-á piⁿ khì. | 「今beh án-chóaⁿ？！」伊進前想也想無，倒轉想也想無有甚物，一切攏是茫茫渺渺。後來伊就真chhiⁿ凊ê款來ka冷sún續企起來行到窗仔邊去。| “Cho̍at-kéng! Cho̍at-kéng!” I chí-ū sòe-siaⁿ lâi án-ni liām tī chhùi-lāi. | 「絕境！絕境！」伊只有細聲來án-ni唸tī 嘴內。| “I phah-hōai, chhiúⁿ-to̍at góa ê it-chhè!” Pek-jím chhiⁿ gîn-gîn ê ba̍k-chiu gia̍h kôaiⁿ khòaⁿ thiⁿ. “It-chhè lóng liáu lah!” I chiū koh kiâⁿ kàu i ê chhn̂g lâi phak tī chhn̂g-téng. | 「伊扑壞，搶奪我ê一切！」百忍chhiⁿ gîn-gîn ê目珠gia̍h懸看天。「一切攏了lah ！」伊就koh行到伊ê 床來仆tī 床頂。| “Chai-lān, góa kap lí ū sím-mi̍h koan-hē!” I ka-gê, chhiat-chhí, gīm chhiú lâi phah chím-thâu. Āu-lâi chiū siang-chhiú lám i ê thâu-khak lâi háu. | 「災難，我kap你有甚物關係！」伊咬牙、切齒，gīm手來扑枕頭。後來就雙手攬伊ê 頭殼來哮。| Keng-kòe chi̍t-ji̍t, nn̄g-ji̍t, saⁿ-ji̍t ê hóan-būn, siong-pi tì-kàu hō͘ i ê ba̍k-chiu chhut-huih lah. Khiok Pek-jím bô kóan it-chhè, i chiong-ji̍t koaiⁿ-ba̍t tī i ê pīⁿ-pâng, bô ài kìⁿ lâng ê bīn. I ê sin-thé ôan-chôan soe-pāi lah. Ba̍k-chiu iā khai-sí bông-bū lah. | 經過一日，兩日，三日ê反問，傷悲致到hō͘ 伊ê 目珠出血lah。卻百忍無管一切，伊終日關密tī 伊ê 病房，無愛見人ê面。伊ê身體完全衰敗lah。目珠也開始茫霧lah。| Kàu tī chiâⁿ lé-pài āu ū chiap-tio̍h ha̍k-hāu thè-ha̍k ê soan-kò ê sî, Pek-jím chiū thǹg i ê pīⁿ-saⁿ, lo̍ah i ê thâu-mn̂g, chéng-lí i ê mi̍h-kiāⁿ, tán-hāu hông-hun-àm ê sî chiah àm-chīⁿ cháu-chhut pēⁿ-īⁿ. | 到tī 成禮拜後有接著學校退學ê宣告ê 時，百忍就褪伊ê 病衫，捋伊ê 頭毛，整理伊ê 物件，等候黃昏暗ê 時才暗靜走出病院。| I ti̍t ti̍t kiâⁿ tùi tong-sî chòe lāu-jia̍t ê Éng-lo̍k ke lo̍h-khì, āu-lâi chiū oat tùi Tâi-pak tōa-kiô kiâⁿ-khì. | 伊直直行tùi當時最鬧熱ê永樂街落去，後來就越tùi台北大橋行去。| Nā siat-sú ū lâng siông-sè khòaⁿ-kìⁿ i ê bīn-iông á-sī thāi-tō͘, lâng beh kám-kak chin-tōa ê kî-kòai lâi kóng: | 若設使有人詳細看見伊ê 面容抑是態度，人beh感覺真大ê奇怪來講：| “Chit-lâng sī tùi bōng-lāi chhut-lâi ê sin-si mah?” | 「這人是tùi墓內出來ê身屍mah ？」| Khiok tong-sî ê Tâi-pak sī tī tāi-chiàn ûi-ba̍t ê ē-bīn chin léng-chēng, hi-bî. | 卻當時ê台北是tī大戰圍密ê下面真冷靜，稀微。| Tāi Tang-a-chiàn í-keng ián-piàn kàu tī sè-kài jī-chhù tāi-chiàn, chhù-chhù chhiong-móa chiàn-cheng ê khì-hun kap bu̍t-chit seng-o̍ah siōng chióng-chióng ê thóng-chè. Tâi-pak chiâⁿ-chòe chi̍t-ê im-tîm, àm-ut, kín-tiuⁿ ê to͘-chhī. | 大東亞戰已經演變到tī 世界二次大戰，處處充滿戰爭ê氣氛kap物質生活上種種ê統制。台北成做一個陰沉，暗鬱，緊張ê都市。| Mî-kan ê tiān-teng siū kóan-chè í-lâi ke-lō͘ siōng hán-hán ū lâng, chí-ū sī kun-tūi ê o̍ah-tāng put-chí hián-jiân nā-tiāⁿ. | 暝間ê電燈受管制以來街路上罕罕有人，只有是軍隊ê活動不止顯然nā-tiāⁿ。| Khiok Pek-jím ê sim lóng thoat-lī liáu chiah-ê sū-chêng. I chi̍t-pō͘ chi̍t-pō͘ lâi peh-chiūⁿ hit-ê chhu-kôaiⁿ ê tōa-kiô téng khì. Kiô-téng ke-lō͘ lóng chin chió lâng teh óng-lâi, nā ū iā sī chin kín-kip ê khóan. | 卻百忍ê心攏脫離了chiah-ê事情。伊一步一步來peh上hit-ê趨懸ê大橋頂去。橋頂街路攏真少人teh往來，若有也是真緊急ê款。| Tong-sî lâng kiaⁿ-liáu siū hiâm-gî, koh lóng-chóng ê khong-khì hō͘ lâng chin kín-tiuⁿ. | 當時人驚了受嫌疑，koh攏總ê空氣hō͘ 人真緊張。| “Góa iáu-ū chi̍t-tiâu tùi-khòng ê lō͘,” i kiâⁿ-kàu kiô ê tiong-chām chiū óa tī hit-ê kiô-lân, lâi khòaⁿ lo̍h kiô-kha ê chúi. Tùi Pang-kiô hong-bīn ū chiò thiⁿ-téng ê kng-sòaⁿ gō͘ la̍k tiâu tī hit-ê o͘-àm kiaⁿ-hiâⁿ ê khong-tiong teh cháu-lâi cháu-khì. Hit-ê kng-sòaⁿ ū hóan-chiò tī an-chēng seh-seh lâu ê tām-chúi khoe-bīn. Hán-hán ū chhia kap lâng tī āu-bīn teh kòe. Hiah-ê lâng ê ba̍k-chiu lóng tâng chi̍t-iūⁿ ê kî-kòai teh kóng. | 「我iáu有一條對抗ê路，」伊行到橋ê中站就倚tī hit-ê橋欄，來看落橋腳ê水。Tùi枋橋方面有照天頂ê光線五六條tī hit-ê烏暗驚惶ê空中teh走來走去。Hit-ê光線有反照tī 安靜seh-seh流ê淡水溪面。罕罕有車kap人tī後面teh過。Hiah-ê人ê目珠攏同一樣ê奇怪teh講。| “Tī chit-ê sî-kî chit-ê lâng tiàm chia teh chò sím-mi̍h? Kiám ū hit-ê pàng-sim mah?!” | 「Tī 這個時期這個人tiàm chia teh做甚物？Kiám有hit-ê放心mah？！」| Khiok Pek-jím lóng bô teh kóan in ê sū. I ê ba̍k-chiu chí-ū ki-hâi-tek tòe hit-ê tī chúi-bīn teh iô-choah, siû-lâi siû-khì ê kng-sòaⁿ. | 卻百忍攏無teh管in ê事。伊ê 目珠只有機械的tòe hit-ê tī水面teh搖choah，泅來泅去ê光線。| “Put-hēng ê pháiⁿ-sîn, góa kiám bô hoat-tō͘ thang tùi-hù lí mah?! Khó-ò͘ siū chiù-chó͘ ê miā-ūn, góa kiám bô hoat-tō͘ thang kái-koat lí ê khu-sok mah?! Góa siū-chīn lí ê ge̍k-thāi lah!! Góa su-iàu kái-koat lah!” | 「不幸ê歹神，我kiám無法度thang對付你mah？！可惡受咒詛ê命運，我kiám無法度thang解決你ê 拘束mah？！我受盡你ê 虐待lah！！我須要解決lah ！」| Ba̍k-sái ê chúi-chôaⁿ móa-lâu i ê bīn. Kòe-khì lóng-chóng ê pi-chhám lóng chhut-hiān tī i ê thâu-náu lāi. | 目屎ê水泉滿流伊ê 面。過去攏總ê悲慘攏出現tī 伊ê 頭腦內。| “Góa tek-khak bô beh khut-ho̍k lí!” I kín-kín tòng-tiām ba̍k-sái lâi gîn bīn-chêng ê thiⁿ. | 「我的確無beh屈服你！」伊緊緊擋恬目屎來gîn 面前ê天。| Tâi-pak chhī ê o͘-iáⁿ phû-chhut tī khoe ê tang-pêng-hōaⁿ. An-chēng bô chòe-siaⁿ teh khùn. Chòng-tōa ê Tâi-ôan soaⁿ-me̍h iā chiàm-móa khong-tiong ê chi̍t-pòaⁿ. | 台北市ê烏影浮出tī溪ê東爿岸。安靜無做聲teh睏。壯大ê台灣山脈也佔滿空中ê一半。| “Sè-kài ah, góa ài-bō͘ lí ê bí-lē, lí ê gē-su̍t, lí it-chhè ê pù-ū kap khòai-lo̍k, khiok kiat-kio̍k góa sit-lo̍h lí, éng-óan kap lí so͘-óan lah! Góa lo̍k-ngó͘ tī lí ê kha-ē......” | 「世界ah，我愛慕你ê 美麗，你ê 藝術，你一切ê富有kap快樂，卻結局我失落你，永遠kap你疏遠lah！我落伍tī 你ê 腳下…」| Ba̍k-sái koh lâu chhut, pi-siong koh tín-tāng i ê chôan-sin. | 目屎koh流出，悲傷koh振動伊ê全身。| “Khó-ò͘ ê miā-ūn, lí thài lī-hāi lah! Lí tōan-cho̍at góa ê o̍ah-lō͘! Lí chiâⁿ-chò góa ê kiû-siû!” | 「可惡ê命運，你太厲害lah ！ 你斷絕我ê活路！你成做我ê kiû-siû！」| “Góa ià-siān lah, góa su-iàu an-hioh!” I tī chhùi-lāi sòe-siaⁿ lâi thò͘-lō͘ móa-pak ê cho̍at-bāng kap òan-hūn. I ê ba̍k-sái ti̍t-ti̍t lâu-chhut. | 「我厭siān lah，我須要安歇！」伊tī嘴內細聲來吐露滿腹ê絕望kap怨恨。伊ê 目屎直直流出。| “Tī chit-ê chúi-té ê sè-kài ū éng-kiú ê an-chēng bông-khiok. I beh tùi góa ê thâu-náu lāi chhat-siau lóng-chóng put-hēng ê pháiⁿ-bāng.” | 「Tī 這個水底ê世界有永久ê安靜忘卻。伊beh tùi我ê 頭腦內擦消攏總不幸ê歹夢。」| “Hit-ê léng-chēng chúi-té ê sè-kài sī tú-tú hō͘ pāi-pok chiá thang éng-óan siám-bih ê só͘-chāi.” | 「Hit-ê冷靜水底ê世界是tú-tú hō͘ 敗搏者thang永遠閃bih ê所在。」| “Put-hēng ê chhiú ah, lí ū sím-mi̍h hoat-tō͘ thang khó͘-chhó͘ góa!” | 「不幸ê手ah，你有甚物法度thang苦楚我！」| I ê ba̍k-chiu khòaⁿ-lo̍h hit-ê chúi-té. Koh khòaⁿ hit-ê khong-tiong. Ū hái-hong chhin-chhiūⁿ kúi-sîn ê siaⁿ, hiu-hiu háu. Hiah-ê kng-sòaⁿ hō͘ i ê ba̍k-chiu o͘-n̄g, i chiū khîⁿ-óa tī hit-ê kiô-lân, i kám-kak i ê ì-sek ū chiām-chiām beh cháu bô-khì, iáu-kú i ló͘-le̍k bán-hôe, lâi pôaⁿ-kòe kiô-lân, chiū chhut-la̍t chiong i lóan-jio̍k ê sin-khu hiat tùi hit-ê chhim-chhim ê chúi-té lo̍h-khì. “Ah!!” Léng-chēng ê chúi chiong Pek-jím ê sin-khu thun lo̍k-khì. | 「伊ê 目珠看落hit-ê水底。Koh看hit-ê空中。有海風親像鬼神ê聲，hiu-hiu哮。Hiah-ê光線hō͘ 伊ê 目珠烏n̄g，伊就箝倚tī hit-ê橋欄，伊感覺伊ê 意識有漸漸beh走無去，iáu-kú伊努力挽回，來盤過橋欄，就出力將伊軟弱ê身軀hiat tùi hit-ê深深ê水底落去。「Ah！！」冷靜ê水將百忍ê身軀吞落去。 |
| | | | | | | | | | | | | | | | | | | | | | | | | | | | | | | | | | | | | | | | | | | | | | | | | | | | | | | | | | | | | | | | | | | | |