 Âng--sī Chin khah siông kiò-chò Ho͘-ḿ, sī Tè Hóan Bo̍k-su ê lēng sian-bó. Chú-āu 1854 nî chhut-sì, kàu kin-nî ( = 1940 nî), tú hióng-siū 86 hòe. 46 hòe ê sî sìn Chú, kiōng 40 nî kú keng-kòe sìn ê seng-o̍ah. Ē lâi chiū-kīn Chú ê tōng-ki, sī tùi tī tú-tio̍h pīⁿ-thiàⁿ, kám-kak pêng-sî só͘ chong-pài ê sîn-pu̍t, bē thang hō͘ i ê sim pêng-an, chiū siū khó͘-khǹg koat-sim chun-thàn tō-lí ji̍p sìn-gióng kèng-pài Siōng-tè. I chin chiàu pún-hūn ho̍k-sāi Siōng-tè, Siōng-tè si-in sù-hok hō͘ i, hō͘ i kiáⁿ-sun chin heng-ōng, kiáⁿ-jî sim-pū, lāi gōa sun chóng sǹg chiâⁿ pah lâng. Lūn kàu i ê seng-pêng chin khó-chhú, ū chē-chē bí-tiám. Chit-tia̍p kì kúi-nā hāng hō͘ lán chò siàu-liām :--- | 洪--氏真較常叫做Ho͘姆，是戴返牧師ê令先母。主後1854年出世，到今年（＝1940年），tú享受86歲。46歲ê時信主，共40年久經過信ê生活。會來就近主ê動機，是tùi tī tú著病痛，感覺平時所崇拜ê神佛，bē thang hō͘伊ê心平安，就受苦勸決心尊趁道理入信仰敬拜上帝。伊真照本份服事上帝，上帝施恩賜福hō͘伊，hō͘伊子孫真興旺，子兒新婦，內外孫總算成百人。論到伊ê生平真可取，有濟濟美點。這tia̍p記幾若項hō͘咱做數念：--| 1. Sìn-gióng kian-kò͘ : Sìn Chú liáu, sui siū lâng kong-kek, phí-po̍k, iàm-chiān, ki-chhì, í-ki̍p tú-tio̍h hōan-lān khùn-khó͘, iā-sī iú-chìn bô thè. | 1、信仰堅固：信主了，隨受人攻擊，phí-po̍k，厭賤，譏刺，以及tú著患難困苦，也是有進無退。| 2. Tì ì ka-têng : Chin kî-biāu ! ! ! Kiáⁿ-sun tōa to-sò͘ kap i tâng-sim kèng-pài Siōng-tè kiâⁿ thiⁿ-lō͘. Ē án-ni, cha-khó khí-lâi, bô m̄-sī tùi tī i ê sìn-sim kap sìn ê hó só͘ kiâⁿ só͘ kám-hòa lâi chiâⁿ--ê. | 2、致意家庭：真奇妙！！！子孫大多數kap伊同心敬拜上帝行天路。會án-ni，查考起來，無m̄是tùi tī伊ê信心kap信ê好所行所感化來成--ê。| 3. Gâu thiàⁿ Chú : Sî-siông chiàu só͘ ē hōng-sū kàu-hōe, koan-sim tī Chú. Te̍k-pia̍t thang hián-chhut i ê thiàⁿ--ê, chiū-sī hiàn kiáⁿ hō͘ Siōng-tè. Cha-bó͘ kiáⁿ hiàn chò Siōng-tè ê lú chhe-ēng, chiū-sī khng Hóan Sian-siⁿ-niû. Hāu-siⁿ hiàn chò Siōng-tè ê lô͘-po̍k, chiū-sī Tè Hóan Bo̍k-su. | 3、Gâu疼主：時常照所會奉事教會，關心tī主。特別thang顯出伊ê疼--ê，就是獻子hō͘上帝。查某子獻做上帝ê女差用，就是康返先生娘。後生獻做上帝ê奴僕，就是戴返牧師。| 4. Jîn-ài hô-pêng : I ê chò lâng, tùi lāi tùi gōa chin ôan-bóan. Ta̍k-lâng to o-ló i ê hó lú-tek, hō͘ kiáⁿ-jî sim-pū chin hàu-sūn. | 4、仁愛和平：伊ê做人，tùi內tùi外真圓滿。逐人都o-ló伊ê好女德，hō͘子兒新婦真孝順。| 5. Ài kî-tó : Hōan ū tú-tio̍h tōa sió sū gâu óa-khò Siōng-tè, kau-hù I chhui-pâi. I tī 3 go̍eh chhe 8 ji̍t khí-pīⁿ ; tī 3 go̍eh 15 ji̍t chá-khí chiū siū Chú kéng-tiàu tńg-khì Thiⁿ Pē ê ke. Tng tī pēⁿ chin lóan-jio̍k ê sî, iáu-kú kî-tó, kiû kóng “Chú ah kiù góa, Chú ah kiù góa.” | 5、Ài祈禱：凡有tú著大小事gâu倚靠上帝，交付伊推排。伊tī 3月初8日起病；tī 3月15日早起就受主揀召轉去天父ê家。Tng tī病真軟弱ê時，iáu-kú祈禱，求講，「主ah救我，主ah救我。」| Phí-jîn chiàu só͘ chai kì chiah--ê, chin siū kám-kek. Chhim-bāng i ê ûi-cho̍k kap lán tāi-ke ē o̍h i ê hó bô͘-hōan ! ! ! | 鄙人照所知記chiah--ê，真受感激。深望伊ê遺族kap咱大家會學伊ê好模範！！！| (Tâi-ôan Kàu-hōe Kong-pò tē 663 hō, 1940 nî 6 go̍eh) | (台灣教會公報第663號，1940年6月) |
| | | | | | | | |