回目錄 回上一頁 本篇文章總共有 9 個段落, 37 個語句, 165 個語詞, 270 個音節
Chhiòⁿ-koa kiâⁿ ke-lō͘ 唱歌行街路--鹽鄉情
Ông Chong-kia̍t 王宗傑
  Siáⁿ-mi̍h sî-chūn
Koh chài chhōa gún
Kiâⁿ-kòe Pak-bûn ê ke-lō͘
Chhiòⁿ-tio̍h khòai-lo̍k ê koa-siaⁿ
Ta̍h-tio̍h hoaⁿ-hí ê kha-po͘
啥mih時陣
Koh再chhōa阮
行過北門ê街路
唱著快樂ê歌聲
踏著歡喜ê腳步
  Siáⁿ-mi̍h sî-chūn
Lín koh-chài tò-tńg
Tò-tńg lâi hái-kháu ê kò͘-hiong
Chhōa chit-kûn chháu-tē gin-á
Chhiòⁿ-tio̍h tông-chin ê koa-siaⁿ
Kiâⁿ-kòe nî-lāu ê chhài-chhī-á
啥mih時陣
Lín koh再倒轉
倒轉來海口ê故鄉
Chhōa這群草地囡仔
唱著童真ê歌聲
行過年老ê菜市仔
  “Chì-hó pêng-iú chiū-sī Iâ-so͘
Tam-tng chōe-kò kap hôan-ló”
「至好朋友就是耶穌
擔當罪過kap煩惱」
  Chhù-piⁿ thâu-bóe
Tōa-sè-hàn gín-á
Tòe-tio̍h lín ê kha-pō͘
Kin-sûi chhùi-chhiò ba̍k-chhiò ê koa-siaⁿ
Kiâⁿ-kòe
Góan-hiong ê ke-lō͘
Góan-hiong ê tiàm-á-thâu
厝邊頭尾
大細漢囡仔
Tòe著lín ê腳步
跟隨嘴笑目笑ê歌聲
行過
阮鄉ê街路
阮鄉ê店仔頭
  “Táⁿ-má-ka liâm-tio̍h kha
Kiò a-pa bé ti-ka”
「Táⁿ-má-ka粘著腳
叫阿爸買豬腳」
  Cha-po͘ gín-á
Cha-bo͘ gín-á
Chhēng ba̍k-kia̍h
khia̍k khia̍k khia̍k
Tòe lín ê kha-pō͘
Chhiòⁿ khòai-lo̍k ê koa-siaⁿ
Kiâⁿ-kòe tōa biō-tiâⁿ
查甫囡仔
查某子仔
穿木屐
Khia̍k khia̍k khia̍k
Tòe lín ê腳步
唱快樂ê歌聲
行過大廟埕
  Àm-tām ê lō͘-teng-kha
Kiâm-kiâm ê hái-hong lāi-té
Tī góa bîn-bāng ê sî-tāi
Pi-chhám ê o͘-kha-pēⁿ hōan-chiá
Ū sió-sió ê kàu-hōe
Lín lâi tòa-niá ta̍k-ke
Sàng hō͘ khó͘-lān ê thó͘-tē
Ū ke-thâu siōng-chá ê koa-siaⁿ
黯淡ê路燈腳
鹹鹹ê海風內底
Tī我眠夢ê時代
悲慘ê烏腳病患者
有小小ê教會
Lín來帶領逐家
送hō͘苦難ê土地
有街頭上早ê歌聲
  “ Thiⁿ o͘-o͘ beh lo̍h hō͘
A-kong giâ ti-thâu leh ku̍t ō͘”
「天烏烏,beh落雨
阿公giâ鋤頭leh掘芋」
  Chhiòⁿ o̍ah-le̍k ê koa-iâu
Ta̍h lí kian-tēng ko͘-toaⁿ ê kha-pō͘
Tòa-niá tōa-hàn sè-hàn
Kiâⁿ-kòe hit-tiâu ke-lō͘
Khia̍k khia̍k khia̍k
Kiâⁿ-kòe
Chú só͘ lîn-bín ê hiong-thó͘
唱活力ê歌謠
踏你堅定孤單ê腳步
帶領大漢細漢
行過hit條街路
Khia̍k khia̍k khia̍k
行過
主所憐憫ê鄉土
回目錄    回上一頁    終戰後,   2001年, 詩