回目錄 回上一頁 本篇文章總共有 6 個段落, 24 個語句, 197 個語詞, 315 個音節
Ang-î chi koa 尪姨之歌--鹽鄉情
Ông Chong-kia̍t 王宗傑
  Kā góa chhōe chi̍t châng ū-ńg ê Chhì-tâng-chhiū kha
Hō͘ góa se̍h--chi̍t-ê hō͘ góa khiā--chi̍t-ê
Hō͘ góa chē--chi̍t-ê
Hō͘ góa ka-tī chi̍t-ê liām-koa
Góa beh kiò Thó͘-tē-kong lâi thiaⁿ
Kā我chhōe一欉有蔭ê莿桐樹腳
Hō͘我se̍h一下hō͘我企一下
Hō͘我坐一下
Hō͘我家己一個唸歌
我beh叫土地公來聽
  Góa beh mn̄g Thiⁿ-kong-peh--á sī án-chóaⁿ
Lâi kā góa kóng chheng-chhó
Góan ê chó͘-sian góan ê kiáⁿ-sun--ah
Sī cháu-khì le̍k-sú ê tó chi̍t-jiah
我來問天公伯仔是án-chóaⁿ
來共我講清楚
阮ê祖先阮ê子孫--a
是走去歷史ê tó一jiah
  Sī án-chóaⁿ Kong-kài lâi piàn-sêng âng-mn̂g-thô͘-piah
Sī án-chóaⁿ góan hiong ê Mûi-hoe-lo̍k cháu kah lóng bô khòaⁿ iáⁿ
Si-la-ia pêⁿ-po͘ ê kiáⁿ-sun--òe
Lán gôan-hiong ê thó͘-tē sī-m̄-sī í-keng tiòng-to̍k
Lán gôan-hiong ê sèⁿ-miā sī-m̄-sī sûi hái-chúi sì-sòaⁿ
Lán gôan-hiong ê chó͘-hoeh sī-m̄-sī iû-gôan le̍h liû-thôan
是án-chóaⁿ公廨來變成紅毛塗壁
是án-chóaⁿ阮鄉ê梅花鹿走kah攏無看影
Se-la-ia平埔ê子孫òe
咱原鄉ê土地是m̄是已經中毒
咱原鄉ê生命是m̄是隨海水四散
咱原鄉ê祖血是m̄是猶原leh流傳
  Lín ta̍k-ke kóaⁿ-kín lâi khòaⁿ
Chi̍t tiâu e̍h-e̍h-e̍h thô͘ kah soa
Iáu chûn kúi chiah chhân-kap-á
Hò͘ lông-io̍h thāu bô sí
Chò-hóe tī hia chhóan-khùi o̍ah-miā thoa-bôa
Lín逐家趕緊來看
一條--a隘隘隘ê塗kah沙
Iáu存幾隻田kap仔
Hō͘農藥毒無死
做伙tī hia喘氣活命拖磨
  Tī lo̍h-hō͘-thiⁿ ê àm-mê leh a̍p-a̍p-a̍p
Góa iōng sio-chiú pun-nn̂g cheng-cheng lām-lām chò-hóe
Hiàn hō͘ lán chit-tè chó͘-sian han-chû ê thó͘-tē
Lâi ak hō͘ góan só͘-ū ê chhiū-châng kah chháu-hoe
Tī落雨天ê暗暝leh a̍p- a̍p- a̍p
我用燒酒檳榔cheng-cheng lām-lām做伙
獻hō͘咱這塊祖先蕃薯ê土地
來沃hō͘阮所有ê樹欉kah草花
  Só͘-ū sèⁿ-miā lóng-sī A-li̍p-chó͘ ê kiáⁿ-sun
Góa chhiáⁿ lán A-li̍p-chó͘ ê sèng-lêng koh-chài kàng-lîm
Kóaⁿ-chhut thun-chia̍h gôan-hiong bûn-hòa ê tōa-kòai-siù
Kiò-chéⁿ kiáⁿ-sun tī ngó͘-hoe-cha̍p-sek ê hun-bê
Tháu-khui khún-pa̍k le̍k-sú thó͘-te ūn-miā ê tōa-soh
Hō͘ góan chó͘-sian ê khe-chúi koh ū gôan-hiong ê hî-hê
所有生命攏是咱阿立祖你ê子孫
我請咱阿立祖你ê靈聖koh再降臨
趕出吞食原鄉文化ê大怪獸
叫醒子孫tī五花雜色ê暈迷
解開綑縛歷史土地運命ê大索
Hō͘阮祖先ê溪水koh有原鄉ê魚蝦
回目錄    回上一頁    終戰後,   2001年, 詩