回目錄 回上一頁 本篇文章總共有 4 個段落, 20 個語句, 81 個語詞, 143 個音節
A-bó leh khùn ê thó͘-tē 阿母leh睏ê土地--鹽鄉情
Ông Chong-kia̍t 王宗傑
  Kiâⁿ-kòe
Hái-ka-tang ô-khak-á ê sió-lō͘
Kiâⁿ-kòe
Lô͘-tek-á chhan-chheⁿ-á
Hoat móa-móa ê un-á-hōaⁿ
Lâi kàu góan a-bó
Chit-sì-lâng î-it ê thó͘-tē
行過
海茄冬蚵殼仔ê小路
行過
蘆竹仔田青仔
發滿滿ê塭仔岸
來到阮阿母
這世人唯一ê土地
  Góan a-bó chi̍t-sì-lâng
M̄-chai siáⁿ-mi̍h sī sò͘-iú-kôan
M̄-chai siáⁿ-mi̍h sī pâng-tē-sán
M̄-chai siáⁿ-mi̍h sī thó͘-tē cheng-ta̍t
阮阿母一世人
M̄知啥mih是所有權
M̄知啥mih是房地產
M̄知啥mih是土地增值
  Góan a-bó leh khùn ê thò͘-tē
Chhiⁿ-chhiⁿ ê chháu-po͘
Kiâm-kiâm ê hái-hong
Bô-mê bô-ji̍t
Liām-tio̍h bô-thâu bô-bóe ê si
阮阿母leh睏ê土地
青青ê草埔
鹹鹹ê海風
無暝無日
唸著無頭無尾ê詩
  Góan a-bó ê thó͘-tē
Bô tē-kè-sòe
Bô pâng-koan-sòe
Bô chēng-ta̍t-sòe
Chí-ū àm-sî
I siōng-ài koan-chheⁿ bāng-táu ê thiⁿ
I ū chi̍t-phìⁿ
Hái-kháu hong-hûn bô-thêng ê thiⁿ
阮阿母ê土地
無地價稅
無房屋稅
無增值稅
只有暗時
伊上愛觀星望斗ê天
伊有一片
海口風雲無停ê天
回目錄    回上一頁    終戰後,   2001年, 詩