回目錄 回上一頁 本篇文章總共有 6 個段落, 18 個語句, 107 個語詞, 168 個音節
Káu-cha̍p-hè Siⁿ-ji̍t Kì-liām Kám-un-si 90歲生日紀念感恩詩
Toh Tōan 卓緞
  Kám-siā Siōng-tè un ke̍k tōa
Chhin-lâng pêng-iú lóng kūn óa
Siōng-tè chiok-hok múi chi̍t-ūi
Lóng-sī Siōng-tè ê kiáⁿ-lūi
感謝上帝恩極大
親人朋友攏近倚
上帝祝福每一位
攏是上帝ê子類
  Siōng-tè chiok-hok chì-bî-sòe
Ke-thiⁿ hòe-siū káu-cha̍p-hòe
Chin-chiàⁿ kám-siā lín tāi-ke
Hoaⁿ-hí tióng-pòe góa chi̍t-ê
上帝祝福至微細
加添歲壽九十歲
真正感謝lín大家
歡喜長輩我一個
  Pē-bú sìn-gióng chin-chiàⁿ súi
Só͘ thôan kiáⁿ-sun ū tē-ūi
Thôan Chú hok-im ū un-sù
Tāi-tāi chin chōe chòe bo̍k-su
父母信仰真正súi
所傳子孫有地位
傳主福音有恩賜
代代真濟做牧師
  M̄-thang kòa miâ khiā chit-ūi
Tio̍h-ài sêng-si̍t hiàn hō͘ Chú
Chòe Chú kng-teng siū chiok-hok
Lō͘-bé ún-tàng chiūⁿ thian-kok
M̄-thang掛名企職位
著ài誠實獻hō͘主
做主光燈受祝福
路尾穩當上天國
  Tāi-ke hoaⁿ-hí lâi chàn-bí
Só͘ chòe ta̍k-hāng lóng sūn-sī
Kim-ji̍t bān-sū kau-thok Chú
Chú un ke̍k tōa bān-nî kú
大家歡喜來讚美
所做逐項攏順序
今日萬事交託主
主恩極大萬年久
  Siōng-tè hō͘ góa ū un-sù
Hō͘ góa chòe si êng-kng Chú
Kám-siā o-ló chú sèng-miâ
Ha-le-lu-iah kám-siā chú
上帝hō͘我有恩賜
Hō͘我做詩榮光主
感謝o-ló主聖名
Ha-le-lu-iah感謝主
回目錄    回上一頁    終戰後,   1992年, 詩