回目錄 回上一頁 本篇文章總共有 10 個段落, 31 個語句, 201 個語詞, 295 個音節
Jīn-sek Chin-chú Siōng-tè 認識真主上帝
Toh Tōan 卓緞
  Só͘ chhun ji̍t-chí sī iú-hān
Iáu-koh khòa-lū chit sè-kan
Sè-kan o͘-àm góa chin kiaⁿ
Khòa-lū kiáⁿ-sun thàn in kiâⁿ
所chhun日子是有限
Iáu-koh掛慮這世間
世間烏暗我真驚
掛慮子孫thàn in 行
  Ūi-tio̍h sè-kan khah kè-thâu
Siōng-tè tō-lí pàng tī āu
Kî-tó Siōng-tè tio̍h chiàu-kò͘
M̄-thang hō͘ in kiâⁿ bê-lō͘
為著世間較過頭
上帝道理放tī 後
祈禱上帝著照顧
M̄-thang hō͘ in 行迷路
  Ūi-tio̍h kiáⁿ-sun kî-tó lâu ba̍k-sái
Góa ê khó͘-sim chí-ū Siōng-tè chai
Ǹg-bāng kiáⁿ-sun só͘ chòe ài li̍p-chì
Sūn-thàn Siōng-tè lâi kiâⁿ hó chí-ì
為著子孫祈禱流目屎
我ê苦心只有上帝知
向望子孫所行ài立志
順趁上帝來行好旨意
  M̄-thang pàng-sak chin tō-lí
Chiah-si Siōng-tè ê kiáⁿ-jî
Tio̍h jīn Siōng-tè ê sèng-kiáⁿ
Beh kiù bān-lâng ê sìⁿ-miā
M̄-thang放sak 真道理
才是上帝ê子兒
著認上帝ê聖子
Beh救萬人ê生命
  Taⁿ lán tō-lí nā m̄ thiaⁿ
Chiong-lâi chiū bōe kàu thiⁿ-siâⁿ
Tio̍h ū jîn-ài lâi saⁿ-thiàⁿ
Chiū ōe êng-kng Chú ê miâ
今咱道理若 m̄ 聽
將來就bōe 到天城
著有仁愛來相疼
就會榮光主ê名
  Miâ-siaⁿ tē-ūi lóng chiām-sî
Put-pí thian-tông ê hok-khì
Ū-thang chia̍h ēng chin kiong-hí
Siōng-tè sù hok ná ke-thiⁿ
名聲地位攏暫時
不比天堂ê福氣
有thang 食用真恭喜
上帝賜福那加添
  Lán sī Siōng-tè ê kiáⁿ-jî
Tè Chú lâi kiâⁿ ōe sèng-lī
Hó-pháiⁿ sī Chú ê chí-ì
Lán tio̍h pàng-sim kau-thok i
咱是上帝ê子兒
Tè 主來行會勝利
好歹是主ê旨意
咱著放心交託伊
  Sè-kan kan-khó͘ khòai kè-khì
M̄-bián kè-thâu lâi siong-pi
Lán tio̍h ti-chiok lâi hoaⁿ-hí
Chiū ōe pêng-an kè ji̍t-chí
世間艱苦快過去
M̄免過頭來傷悲
咱著知足來歡喜
就會平安過日子
  Pêng-an chòe tōa ê hok-khì
Chhiáⁿ lán tāi-ke tio̍h chún-pī
Kàu-sî Chú beh chhōa lán khì
Chhōa lán kìⁿ pē chin hoaⁿ-hí
平安最大ê福氣
請咱大家著準備
到時主beh chhōa 咱去
Chhōa 咱見父真歡喜
  Sī I kéng-sóan ê kiáⁿ-jî
Pêng-iú chhin-lâng beh saⁿ-kìⁿ
Kiù-chú hoaⁿ-hí lâi ngiâ-chih
Tāi-ke chheng-chàn teh gîm-si
Khò Chú tit-tio̍h tōa sèng-lī
是伊揀選ê子兒
朋友親人beh相見
救主歡喜來迎接
大家稱讚teh 吟詩
靠主得著大勝利
回目錄    回上一頁    終戰後,   1985年, 詩