台語華語辭典
台灣記憶
[轉去本站首頁]    [轉去台灣俗語鹹酸甜]

輸人m̄ 輸陣,輸了歹看面。

    有競爭才有進步,有比賽著有比 phēng,che.是社會進步ê 動力,所以咱ê 社會透叨位都有比賽,若有比賽著有人看鬧熱:運動會leh走相jiok比賽,運動庭總是鬧熱滾滾;學生讀冊著比賽,比賽看啥上gâu讀,m̄-chiah 60 分為及格,100 分卻是滿四界;生理人開店看啥有人氣,花箍見排著是塞倒街;庄腳人冬尾戲請人客,共款phēng落去,五、六桌是平常,十桌無算濟,二、三十桌猶原有人辦理,為啥麼,kan-nā 為著「輸人m̄ 輸陣」,儉腸neh 肚kâng. 借嘛著愛辦落去,恐驚人客請了傷少「輸了歹看面」。
    選舉是最激烈ê 比賽,造勢比大陣,海報比大支,旗仔滿滿是,廣告放送大聲排第一,拼落去--ò͘ ,「輸人m̄ 輸陣,輸了歹看面」,頭. 既然洗落去,無剃bē 使chit ,面子卡要緊,管伊市容衛生,管伊吵人擾亂,管伊開錢那開水,啥麼是民主,選了才閣講。
    民主運動,在人膨風,據在你按怎講,講hō͘ 伊爽,做會到做bē 到,暫時poah 一邊,我是候選人,投票前chit 幾工是我ê 天,無拼beh 怎樣,用心計較嘛是為chit 擺。
    為chit 擺,拜託拜託,請候選人遵照法令,為逐家嘛為你家己,做一擺清氣選舉,君子比賽,mài 為著「輸人m̄ 輸陣」來惡性競爭,才bē 時到選輸,才來「輸了歹看面」,抑是輸了m̄ 甘願,落選煞起hê-ku ,「輸了lān 鳥面」。
轉去