台語華語辭典
台灣記憶
[轉去本站首頁]    [轉去台灣俗語鹹酸甜]

聽我ê 話,m̄-thang 看我ê 樣。

    講有一個做司公--ê ,對伊ê 父母誠不孝,街路thàng-kah 庄腳通人知,m̄-kú 伊誠gâu 做司公,念著經聲韻好閣有照起工,特別嘴水好,o-ló 人囝孫有孝,甘開甘做功德hō͘ 序大人;gâu 講好話,見講是四句聯,m̄ 是中狀元著是財子壽,一句嘛「有--ò͘ !」兩句嘛「好!」自按呢生理真ka-ia̍h ,m̄-nā 趁司公禮,閣有紅包thang 提。
    有一擺,伊擔經講目蓮救母ê 故事,伊按呢一直念:奉勸諸位想看覓,咱ê 身軀叨位來,父母恩情深如海,孝順雙親才應該。人講家貧出孝子,sàn 人攏嘛卡仁慈,奉待父母順伊意,bē 曉有孝那精生。o͘-mih-tō͘-hu̍t !各位人客官,念經是beh 念hō͘ 逐家聽,好歹恁著注心tiāⁿ ,「聽我ê 話,m̄-thang 看我ê 樣。」正經ê 話恁著聽。o͘-mih-tō͘-hu̍t !
    頂面講--ê 雖然是一層笑話,「聽我ê 話,m̄-thang 看我ê 樣。」嘛是有道理,基督教教人m̄-thang 偶像崇拜,著是叫人千萬bē 使相信一個聖人、gâu 人ê 一切,人無十全十美,教人仁義道德,講ê 人本身m̄ 知有照講照行無?自古來著「經師易求,人師難chhōe 」,崇拜一個人,若beh 好bái 攏照伊ê 樣,按呢包死--ê ,佛經講--ê ,依法不依人,著是chit ê 意思。
    「聽我ê 話,m̄-thang 看我ê 樣」,做老師--ê ,chit 句話bē 通--ō͘ ,為人師表,m̄ 免一表人才,嘛著食、衣、住、行、育、樂,以身作則照步來。
轉去